Musei
Eccu i musei chi pruponenu visite, cunferenze o altri eventi in lingua corsa
Museu di a Corsica
U Museu di a Corsica hè natu in 1997 da a vuluntà di a Culletività Territuriale di dutà l’isula d’un spaziu culturale d’altu livellu. Situatu ind’è a citadella di Corti, situ storicu è patrimuniale, u Museu di a Corsica fà u testimone di l’affettu di i corsi pè u so patrimoniu.
Dipoi 1991 è u rinnovu architecturale urchistratu da Andrea Bruno, u Museu di a Corsica hè un locu spaziosu, luminosu, prupiziu à a scuperta.
Visite guidate in corsu o talianu (cù riservazione).
Museu Etnogràficu Anton Dumenicu Monti
Appertu in l’anni 1970, issu museu di l’arte è di e tradizione populare di Corsica si trova in Cervioni (Corsica Suprana) è hè cumpostu di quattordeci sale accunciate ind’è l’anticu siminàriu di a chjesa San Teramu. Ogetti di i tempi passati, di l’agricultura è d’altri mistieri d’eri si possunu truvà quì ; ritruvemu dinù ricustituzione di un fucone o di a stamparìa di u “173e Régiment d’Infanterie”.
Visite guidate in corsu pussibile (cù riservazione).
Museu di i bell’arti – Palais Fesch
Stu museu, situatu in Aiacciu ind’è a stretta epònima, hè natu di u donu fattu da u Cardinale Joseph Fesch, zìu di l’imperatore, à a so’ città di nàscità. Ind’è i so’ diciassette sale, u museu Fesch rigala l’uppurtunità d’ammirà circa quattrucentu òpere d’arte, principalmente pitture è sopratuttu pitture taliane chè affiziunava assai u Cardinale Fesch.
Una volta ogni mese, u ghjovi, u Museu pruprone cunferenze temàtiche in lingua corsa (prugramazione 2017 in attesa).