In memoria di e donne vittime di u feminicidiu

Qualchi volta à l’imbellita si scopre una nuvità. In vulendu visità u centru storicu di Piombino prima di piglià u traghettu per a Corsica, una lapide hà surpresu a mio curiosità. Un la circava, ignurente di à so esistenza, (unica podassi) ma s’hè presentata à me, dicieraghju ancu s’hè offerta à u mio sguardu. Hè vera chì, in passeghju per cità scunisciute, e lapide poste à i muri di i palazzi, o à i canti di una via, accendenu spessu l’occhji. Ed eu, sò curiosu di leghje a storia ch’elle  contanu in poche parole : “quì hè natu… quì hè mortu… in stu loghu si ricorda…”. E cità facenu cunnosce à u passente qualche figure celebre, qualche eroe che u tempu sguassa di e mente, ma che u scrittu sculpitu inde u marmaru stampa  per anni.

In Piombino à u pede di u castellu chi apre u core storicu è a via pedunale versu a Piazza Bovio bellu promuntoriu nanta u tirrenu, una lapide ghje stata posta à u mezu di un giardinettu fiuritu. Sta lapide ricorda i martirii di e donne morte sottu à i colpi di quelli chi duvìanu amalle. Una lapide à fine che “e so storie ùn s’affondinu inde u silenziu, ma sveglianu e cuscienze è a civiltà”.  Bellu omaggiu, di sta piccula cità tuscana à tutte e donne inde u mondu viulentate à morte da i cumpagni, senza pudè difendesi e qualchi volta obligate di tumbà per salvà à so vita. Jacqueline Sauvage in Francia ghje stata cundannata à 10 anni di prigiò per avè ucisu u so maritu chì durente quarant’anni l’ha ticchjata di colpi. A ghjustizia ùn hà vulsutu ricunnosce a “legitima difesa”. U presidente François Hollande hà cuncessu a so grazia, ma a stessa ghjustizia ha decisu di manténela in carcere. Donne pulitiche, eletti è eletti, ghjente anonime si mubiliseghjanu durente st’etate per à liberazione di Jacqueline Sauvage. C’hè in Francia ogn’annu in media 140 donne chi morenu di viulenza cunghjugale, ci n’hè una sessantina in Italia. A lapide discreta  di Piombino, raru munumentu citadinu per sti fatti, alza ste donne vittime à u livellu  di tutti l’altri morti nucenti. Quelli di e guerre onorati da impunenti e maestosi munumenti, vittime d’attentati… E dà ragiò à e donne chi si ribellanu. A Cumuna di Piombino merita, per st’iniziativa, una rucuniscenza internaziunale.

—–
Articulu è fotò di: Petru-Luigi Alessandri – Fotò principale: Geoplan.it