Manifestazione : “NO” à a riforma di u codice di u travagliu

Ghjeranu centinaie indè i carrughji di Bastia e d’Aiacciu per dì « NO » à a riforma di u codice di u travagliu vulsuta da u Guvernu Macron. I curtei si so furmati à a chjama di u sindicatu CGT à u quale s’eranu aduniti d’altri sindicati cume à FSU di l’educazione naziunale, l’unione ” Solidaires » o l’UNSA.

U sindicatu di l’avvucati di Francia e quellu di a Magistratura avianu fattu cunnosce u so ricusu di sta riforma. « Un cappieremu nùnda » ghjera u motu di i manifestenti. In Bastia u curteu s’hè apertu incu u cantu in talianu « Bandera Rossa ». Ghje di fronte à è prefetture che i rispunsevuli di a CGT hanu prununziatu discorsi,mettendu in causa u Guvernu di vulè adebulì a situazione di l’uperai .

D’in fatti, oramai è strutture chi ripresentanu u persunnale, di tre ùn ci ne serà più che una. Cunsequenza : menu ripresententi sindicali e menu eletti. Per i licenziamenti,ancu à i torti di i patroni, l’allucazione s’eranu limitate. I sindicati un’averanu più u monopoliu per firmà testi indè l’intraprese. Macron finisce di rompe cusi cos’avia messu in’opera u Guvernu di François Mitterand indè l’annate ottanta incù è legge di u Ministru Auroux chi vulìa fini la indè l’intraprese « incu u rumore di e macchine e u silenziu di l’uperai ». A riforma Macron ghje ùn ritornu à 50 anni in daretu dinunzianu i sindicati e dinò parechje persunnalità e eletti di manca cume l’anziana ministra sucialista di l’affari suciali Martine Aubry Sindaca di Lille. In qualchi settimane Macron hà sguassatu tuttu cosell’avia fattu à favore di i travagliatori e per megliurà a cundizione suciale di e povare ghjente u ” Cunsigliu naziunale di a Resistenza » dopu a guerra in 1945 spieganu   dinò i sindicati. Cummunisti e u partitu di Melanchon « La France Insoumise » avertenu : «  a cuntestazione ùn si fermerà, un face che principià ». « Vulemu torce u collu à u disimpiegu » risponde u Guvernu. Ma sindicati e uppusizione dimostranu che indè i paesi cume a Germania, e misure simile hanu creatu impieghi precarii e attempati. C’hè in Allemagna 28 % di uperai poveri, ci nè 8 % in Francia secondu dati naziunali.

—
Articulu di : Petru Luigi Alessandri