A presentazione di a 19esima edizione di i Scontri Musicali di u Mediterragnu s’hè fatta à u Museu di Bastia. Per l’occasione, Merre, rispunsevuli culturali di u Municipiu è urganisatori avìanu invitatu a stampa.
Dipoi quasi 20 anni Bastia è a Corsica à u mese d’ottobre si mettenu à l’ora musicale. Cità, paesi, teatri, chjese, scole, piazze si mutanu in salle di cuncerti. Un veru scontru incù a musica è sopra tuttu i musichenti vennuti per fà cunnosce, anzi sparte una passione. Mumenti d’intensa cumunione, di curiusità, di piacè.
Da u 6 di nuvembre à u 13, 150 musichenti sbarcanu indè l’isula. Francia, Italia, Spagna, Principatu di Monacu,Tunisia, Maroccu, Malta. A ogni edizione c’hè un paese chi ùn face parte di u mediterragnu chi ghje invitatu è st’annu ghje u Giappone. Cunfrontu di duie tradizione musicale. Una chi piglia surghjente indè radiche latine è l’altra bagnata da u mare asiaticu. Strumenti diversi à i soni d’assumiglianza chi traducenu ognunu una verità sfarente. I scontri sò dino paragoni è custati che a cultura è in particulare a lingua musicale custruiscenu ponti. U tuccà è u sente chi rendenu a cummunicazione umana. A musica chi appaghja in’un mediterragnu à e sponde chi si straccianu e vite. “I scontri so veri ponti” insiste u presidente Guidu Dongradi chi ghje à l’origine di sta manifestazione.
È vistu l’impurtenza, i Scontri cunnoscenu successu al dilà di a Corsica. A stampa egizziana ne parla, cume quella di Tunisia paese chì hà prupostu à i scontri di parte di Cartagine. E dinò u principatu di Monacu chi dipoi u prim’annu hà vulsutu participà à l’urganisazione incù à so Academia di Musica, chi d’altronde aprerà u ciclu di i cuncerti u 7 nuvembre in chjesa d’Oletta. Poi à a serata mediterranea u 9 nuvembre à u teatru di Bastia inseme à l’Egittu.
A Corsica ghjè più che presente à si scontri incù una decina di gruppi musicali è di cant’autori, ma c’hè dinò qualchi pianeta di l’Arte Lirica chi si feranu sente cume a Mezzo soprano giappunese Misumo Takahashi u Tenore Egizzianu Ragaa El Din di fama internaziunale è u direttore d’orchestra talianu Alessandro Crudele.
Petru Luigi Alessandri.
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Redazione